:: أصغـر ذنوبي ::
يوم انكسر موج البحر والشمس مالـت للغـروب
واللون الاحمر قام يسجد فـي طـرف محرابهـا
استرسلـت ريـح الشتـا والملـح عيـا لايـذوب
وتغنت طيـور البحـر بازكـى لحـون اسرابهـا
وقفـت وقفـة مومـن يعـد الخطايـا والذنـوب
ويراجـع اللـي فـات واعمالـه يفـل كتابـهـا
اكبر ذنوبه حلق دقن ونقص فرض وطـول ثـوب
واصغر ذنوبـه قـرب نـاسٍ ماتعـز اصحابهـا
ياليتنـي قبـل اختلـط بالنـاس فتشـت القلـوب
وعرفـت وش تخفـي ورا جدرانهـا وابوابـهـا
ماكان سجيـت القـدم فـي جرهديـات الـدروب
والا ورطت الورطـه اللـي ماحسبـت حسابهـا
اثر المظاهر تستـر عيـوب وتبيـن لـك عيـوب
كـم زينـت هنـدام نــاسٍ شيـنـت هندابـهـا
سواد في لمحة بياض وفرق واضـح ومحسـوب
سـواد نيتهـا علـى هامـش بـيـاض ثيابـهـا
غلطان من هو ياخذ الحيات فـي وسـط الجيـوب
يسـري يلاعبهـا وطعـم المـوت بيـن انيابـهـا
ياملاعب الحيات ينفث سمهـا مـن كـل صـوب
وان قلت باقطـع روسهـا لفـت عليـك اذنابهـا
وانا على طرفي نقيض اكسب رجل واخسر شعوب
تبـلانـي الايــام وانــا مابحـثـت اسبابـهـا
اكبر ذنوبي عاقـد العـزم ابتعـد عنهـا واتـوب
واصغر ذنوبي ماقـدرت احيـا واعيـش الا بهـا